Ka ophis jong ka District Social Welfare Officer, West Khasi Hills District, ka la pynlong ïa ka Samajik Adhikarita Shivir hapoh ka Ministry of Social Justice & Empowerment, Sorkar India, na bynta ki Tymmen (Senior Citizens) bad ki kiba don jingduna Dkhot Met (Divyangjan) ha Vanni Hall, St. Peter’s, Pyndengrei, Nongstoin, West Khasi Hills District.
Ïa kane ka prokram la pynlong da ka District Social Welfare Office bad ka District Administration, Nongstoin, West Khasi Hills District ryngkat bad ka jingïatreilang bad ka Artificial Limbs Manufacturing Corporation of India (ALIMCO), kawei na ki lad jingïarap jong ka Sorkar India hapoh ka Ministry of Social Justice & Empowerment.
Ïa kane ka prokram la pynlong hapoh ka Rashtriya Vayoshri Yojana (RVY) bad ka Assistance to Disabled Persons (ADIP) Scheme bad la bei pisa da ka Central Government lyngba ka Senior Citizens Welfare Fund.
Ka jingthmu ka long ban kyrshan ïa ki Tymmen (60 snem shaneng) kiba shah ktah ha ki jingduna ba la wan na ka rta kum ka jingduna ha ka bor ïohi, ka jingïoh sngew, jingduh noh ki bniat bad jingduna ha ka ïaid ka ïeng. Ha kajuh ka por, kiba Don jingduna ha ka met ka phad (Divyangjan) ruh la ai jingïarap katkum ki kyndon jong ka ADIP Scheme.
Haduh 1,166 ngut ki nongïoh jingïarap na ki block bapher bapher jong ka West Khasi Hills District ki la ioh jingïarap lyngba kane ka programme. Ki nongïoh jingïarap ki kynthup ïa ki Tymmen ba la palat 60 snem kiba dei BPL lane kiba ka jingioh ha ka shi bnai ka long T.15,000 tyngka katkum ki kyndon jong ka scheme.
La ioh ban sam ïa bun jait ki tiar jingïarap kum ki tiar iarap ban iaid, ki tiar iarap ban ioh sngew, ki it-khmat. La ai ruh ïa ki tiar kyrpang kum wheelchair commodes, spinal support bad knee braces. Ka ALIMCO kan ai ka jingsumar bad jingïarap khlem donkam siew haduh shi snem bad na bynta ki Tymmen palat 80 snem ïa ki tiar jingïarap yn leit buh sha ki ïing jong ki.
Ia kane ka prokram la wan ban long Kongsan da u Bah Methodius Dkhar, Myntri ka sorkar jylla, Bah Gabriel Wahlang, MLA kaNongstoin Constituency, kum u symbud Kongsan ha ryngkat ka jingiadonlang ka Hema Nayak, IAS, Deputy Commissioner, West Khasi Hills District ki ophisar sorkar bad kiwei kiwei.
Ha ka jingkren jong u, u Bah Methodius Dkhar ula kyntu ïa ki nongïoh jingïarap ban pyndonkam hok ïa ki tiar ba la ai, khnang ba kin ïoh ia ka jingmyntoi. U la ong ba kane ka prokram kam dei tang ka kam jong ka Sorkar hynrei ka dei ka jingkitkhlieh jong ka imlang sahlang baroh kawei, bad ka jingïarap ïa ki tymmen bad ïa kito kiba donkam jingïarap ka dei ka kam ba dei ban leh da ka mynsiem jingïasuk bad jingïaroh.
Ïa ka prokram la sdang da ka jingkren pdiang sngewbha na ka Smt. D. Pakyntein, District Social Welfare Officer (DSWO). Kiwei pat ki riew rangbah ba la donlang ki kynthup ïa u Dr. Z. Marak, Medical Superintendent; Dr. W. Sutnga, Specialist, Office DM&HO, u Shangsu Sengupta, Manager, ALIMCO, Guwahati, ka C. Kharbhih, DSEO; u T. Kyndiah, DCPO; Fr. Marius Thongni, Parish Priest, Pyndengrei Parish, ryngkat bad kiwei pat ki ophisar jong ka district.
Ka Samajik Adhikarita Shivir ka pynpaw ïa ka jingai ti lut jong ka Sorkar India ban kyntiew ïa ka jingpynïasoh paidbah, ka jingïatylli bad ka jingim ba kham bha na bynta ki tymmen bad kiba don jingduna dkhot met.