Ka Dorbar Shnong Golflink bad ka Seng Samla Golflink Dong Mawpun, kila pynpaw ia ka jingbynniaw ia ka jingtrei torti jong ka tnad Public Health Engineering (PHE) Department bad ki Kontraktor kiba la shu ieh ia ka surok hadien ba kila dep ban tih ban siang ia ki pipe um.
Ki nongialam shnong kila pynpaw ba kane ka jingleh ka tnad PHE bad ki Kontraktor kiba pyntrei ia ka kam, khlem da maramot ne shna ia ka surok mynta la bun bnai, kala pynthud ia ka leit ka wan jong ki paitbah bad ia ki nongshong shnong ka Mawpun, Golflink.
Ka Seng Samla bad ki nongialam ka Dorbar Shnong hynne ka sngi, kila leit ban jurip ia ki surok ha ka shnong, hadien ba kila ioh ia ki jingujor na ki nongshong shnong kiba la pynpaw ia ka jingsyrtok ha ka iaid ka ieng lyngba ka surok ha shnong namar ba ki kontraktor kim shim la shna ne maramot ia ka surok hadien ba kila dep ban tih mynta la lah 3 bnai tam bad kane ka jingieh shrah ka jongki kala buh ha ka jingma ia ki nongiaid nongieng.
U President ka Seng Samla Golflink Mawpun Unit u Samla Kordor L. Nongkynrih ula pynpaw ia ka jingsngewkhia halor ka jingpynslem ban trei pyndep ia katei ka kam bad watla kila dep ban siang ia ki pipe um, hynrei kim shym la shna pat ia ka surok kumba kadei ban long bad kane kala ktah jur ia ki paitbah.
Ka Seng Samla kala kyntu ia ka Dorbar Shnong Golflink ba kadei ban tuklar mardor bad ban shimkhia ia kane ka mat bad ki bor kiba dei khmih khamtam eh bad ka tnad PHE bad ki Kontraktor, ban pynthikna ba dei ban trei pyndep noh mardor ia katei ka kam bad ban shna ne maramot biang ia ka surok na ka bynta ka jingshngain jong ki paidbah.
U Rangbah Shnong u Bah Michael Hek ula ong ba ka Dorbar Shnong Golflink, kala ai por shi taiew ia ki kontraktor ba kidei ban maramot noh ia ka surok kaba kila dep ban tih bad lada ki pulom ban leh eiei ia katei, kumta ka Dorbar Shnong kam banse ban leit ujor da ka ejahar bad ban shim ia ki sienjam kiba tyngeh, kynthup ha kaban weng noh ia ki pipe um kiba la dep ban siang.
U Bah Micheal ula pyntip ba ka Dorbar Shnong kala dep ban pynsngew sha ka tnad Public Works Department (PWD) ha kaba iadei bad ka jingsniew jong ka surok bad ka PWD kala pynshai ba ka tnad PHE kadei ban shim ia ka jingkitkhlieh kaba la pyntrei ia ka kam ban siang pipe um bad ban shna pynbha biang ia ka surok.